Рецепт од вештите раце на Бобе Јанкоска: Домашен ликер од јагоди
Јованка Јанкоска Бобе, која стои зад блогот bobesbakery.mk, фејсбук и инстаграм-профилот, е вистински кулинарски креативец – нејзините рецепти се милина и за очите и за непцето.
Бобе денеска споделува еден интересен, освежителен рецепт – домашен ликер од јагоди.
„Интензивниот мирис и вкус на јагодите, му даваат на ликерот интересен и незаборавен шмек“, вели Бобе.
Состојки:
– 500 грама јагоди (сечкани)
– 250 грама шеќер
– 5-6 каранфилчиња
– 0,5 литри вотка или ракија
Начин на подготовка:
Јагодите прво исчистете ги, исечкајте ги, па ставете ги во тегла и тоа – ред јагоди, ред шеќер. Се додаваат и каранфилчињата, па се полни теглата со вотка (ракија).
Се затвора теглата и се остава на сонце да стои три недели. Теглата повремено се превртува по неколкупати, да се растопи шеќерот. Кога ќе помине определеното време, се процедува ликерот преку газа и се полни во шише.
На здравје!