Металург и црногорскиот пикер Бранко Канкараш спогодбено го раскинаа договорот, со што му се даде можност на овој играч да замине во клуб заинтересиран за него, надвор од Македонија.

Овој прекин на соработката доаѓа како резултат на лимитираниот број на странци во македонското првенство, поради што Канкараш средбите ги мина на трибините.

– Донесовме заедничка одлука со Канкараш дека е најдобро сезоната да ја доигра во клуб од кој што и играчот, а и ние добивме одлична понуда. Лимитираноста во бројот на странци кои можат да настапуваат во домашно првенство беше причината Бранко да ги проследи натпреварите од трибини, што за играч од негов ранг е неприфатливо.

Од друга страна РК Металург има двајца македонски играчи на таа позиција. Со оглед на тоа дека ништо нема да се промени во вториот дел од сезоната, донесовме заедничка одлука сезоната да ја доигра во друг клуб, со можност за враќање во Металург во наредната сезона, но со понаков играчки кадар за да може согласно правилото за странци да се извлече максимумот од секој играч во поглед на минутажата.

Во наредниот период Металург ќе ја засили бековската линија, а оставам и можност за трет голман – изјави претседателката на Металург, Зорица Блажевска.