Раси на кучиња идеални за интроверти: Уживаат да седат во своите домови
По навика мачките ги сметаме за домашни миленици кои ги чуваме во домот, а кучињата надвор во дворовите. Овие крзнени миленици се индивидуи исто како нас, но има некои општи карактеристики на одредени раси кои ни кажуваат дека некои од нив претпочитаат да поминуваат време внатре отколку надвор, пишува „Пјурвау“.
Кога станува збор за кучиња, постојат раси на кои им е потребен помалку простор за да ја трошат својата енергија и генерално повеќе го ценат тоа што се чуваат во затворени простории. Тоа не значи дека воопшто не им треба внимание и грижа, туку дека во целина ќе бидат малку посмирени од другите кучиња.
Тие сепак ќе сакаат да одат на прошетка и не мора да се препорачуваат само за луѓе кои живеат во згради, но дефинитивно ќе уживаат да ви прават друштво додека ја гледате омилената серија.
Басет
Најмногу им одговара да бидат во затворени простории и да се без премногу обврски. Задолжително е барем едно излегување на прошетка, во кое секако ќе ужива, но по враќањето дома со задоволство ќе ја продолжи дремката.
Булдог
Потребна им е физичка активност за да немаат проблеми со вишокот килограми, но со ова не треба да се претерува. Знаат да бидат чувствителни на долго изложување на сонце и претерано високи температури, но најмногу сакаат да се излежуваат во сопствениот простор.
Кавалер Кинг Чарлс шпаниел
Тие се една од најприлагодливите раси на кучиња, кои сакаат да си играат со децата на отворено, но и со часови да одмараат под покривката на каучот. Нивните навики ќе зависат од вашите и ќе ги следат активностите на вашето семејство.
Чивава
Ќе ве придружуваат на секој чекор додека сте во вашиот дом. Со задоволство излегуваат на кратки прошетки, но не им треба многу активност и вежбање. Одговараат на луѓето кои живеат во станови поради нивната големина, но прилагодувањето сепак зависи од вас.
Чау чау
Да, тие се малку поголема раса, но не сакаат премногу да се движат и да комуницираат со непознати луѓе и кучиња. Најубаво им е со семејството на кое најчесто се исклучително посветени, а во многу навики потсетуваат на мачки.
Котон де Тулеар
Нежни, меки и неодоливи, вака накратко би можеле да се опишат овие кучиња. Тие се активни и сакаат да играат, но сите нивни потреби можат да се задоволат во домот. Единствено важно е да им набавите многу играчки за да не им биде здодевно.
Малтешка пудлица
Оваа раса на кучиња се прилагодливи на вашиот животен стил и се идеални за мали домови. Ќе уживаат да ви прават друштво во домот, што и да правите во моментот, а ќе ви бидат благодарни за секој момент на внимание.
Мопс
Потребно им е многу вежбање за да останат во форма, но не премногу, за да не се изнемоштат. Тие се една од најпопуларните урбани раси поради нивната приспособливост, но и нивната посветеност на семејството и домот.