Рашков: Претходната влада на изборите сакаше да донесе 15 илјади Македонци со бугарско државјанство
Во Бугарија денеска е почната специјална полициска акција, што ќе трае до денот на изборите, најави техничкиот министер за внатрешни работи, Бојко Рашков. Тој денеска најави дека поранешен бугарски министер за внатрешни работи и поранешен регионален гувернер се состанале во Ќустендил за да разговараат за тоа како да привлечат 15.000 Македонци со бугарско државјанство да гласаат во Бугарија.
-Ова е еден од случаите за купување гласови, на кој работи МВР, најави в.д. министерот за внатрешни работи Бојко Рашков на прес-конференција.
Како што јави дописникот на МИА од Софија, повикувајќи се на она што го изјави бугарскиот министер Рашков, имало и други информации за „изборен туризам” во регионот на Благоевград, како и контрола од страна на лихварите во регионот Карнобат, па дури и лажни апликации за гласање во Германија.
Поранешниот гувернер на округот е хоспитализиран.
-Тој е болен за работа, но не е болен за таков собир, каде разговарале за прашањето како да привлечат 15.000 Македонци со бугарско државјанство за да гласаат во нашата земја. Повторувам – поранешен министер за внатрешни работи, искоментира министерот Рашков.
Според актуелниот бугарски министер за внатрешни работи, полицијата има податоци дека во многу населени места се планира да се концентрираат голем број бугарски граѓани на истата адреса во деновите пред изборите.
-Одржан е состанок и разговори со регионалниот гувернер на Благоевград, каде во едно село во округот илјадници граѓани, кои се регистрирани таму, одеднаш се појавија на истата адреса, рече Рашков.
Оваа изборна техника се очекува да се спровде и во други области.