Ракометниот клуб Вардар 1961 ја продолжува победничката серија во македонската Суперлига, во Автокоманда „црвено-црните“ доминираа и славеа против РК Алкалоид на Кирил Лазаров со 22:30.

Играчите на Владо Недановски ги држеа конците на играта, сите дилеми беа решени веќе по првото полувреме кога актуелните шампиони имаа позитива од „плус осум“ (15:7).

РК Алкалоид успеа само во првите 10 минути од вториот дел да намали нешто од негативата (11:16), но неговиот противник не дозволи никакво изненадување, во 43 минута предноста повторно порасна и на семафорот стоеше 16:24.

До крајот на средбата беше само рутина за Вардарци во чии редови први стрелци беа Талески и Моралес со по шест голови, а на спротивната страна Митев имаше шест погодоци, два помалку Серафимов.

Во истата група „А“ составот на Охрид триумфираше над Куманово со резултат 32:17. На табелата води Вардар 1961 со 33 бодови, пред Алкалоид кој има 27, на четвртата позиција е Охрид со 18, додека Куманово е претпоследен со три.

Еурофарм Пелистер 2 ја запиша шестата победа во рамките од групата „Б“ откако со 25:21 го совлада Голден Арт. Битолскиот тим е на четвртото место со 19 бодови, веднаш пред Голден Арт на петтата позиција со 12.