Екипата на Работнички која во кошаркарската сезона влезе со големи амбиции да се бори за двата трофеи во домашниот шампионат како и да се бори за влез во АБА лигата, на крајот остана без ниту еден трофеј.
Тимот од Градски парк тотално потфрли во АБА2 лигата каде не успеа да се пласира во плеј-офот, а разочарувачки за најтрофејниот кошаркарски колектив во Македонија беа и резултатите во домашните натпреварувања. Работнички загуби во финалето на Купот на Македонија од МЗТ Скопје, додека во разигрувањето за титулата во полуфиналето беа елиминирани од Еуро Никел во два натпревари.
Поради тоа, управата на Работнички одлучи да се раздели со тренерот Димитар Мираковски, односно да не му го продолжува договорот кој истече по поразот од Еуро Никел.