Путин предлага „празнично“ примирје, Зеленски бара траен мир
Украинскиот претседател Володимир Зеленски рече дека допрва ќе се испитува дали предлогот на Кремљ е само маневар за заштита на московската парада или искрена иницијатива.
Украина ѝ предлага на Русија долгорочен прекин на огнот, откако рускиот претседател Владимир Путин предложи привремено примирје за прославата на Денот на победата, објави „Киев индепендент“.
Препорачано
Овој предлог дојде по вчерашниот телефонски разговор на Путин со претседателот на САД, Доналд Трамп, во кој рускиот лидер изрази подготвеност да прогласи привремена пауза во борбите околу комеморациите за 9 мај — Денот на победата.
Москва претходно ги намали плановите за својата годишна парада, која служи како демонстрација на воената моќ, поради страв од потенцијални украински напади.
– Ќе разјасниме за што точно се работи, за неколку часа безбедност за парада во Москва, или за нешто повеќе. Нашиот предлог е долгорочен прекин на огнот, сигурна и гарантирана безбедност за луѓето и траен мир – рече Зеленски.
Зеленски додаде дека им наложил на украинските преговарачи да стапат во контакт со американската страна за да ги разјаснат предлозите на Москва.
Русија индоктринира украински деца — како Путин ја гради својата пропагандна машинерија?
„Русија го прекрши велигденското примирје над 400 пати“
Забелешките на украинскиот претседател го нагласуваат стремежот на Киев за поширок и поиздржлив прекин на непријателствата, откако Русија повеќепати ги одбиваше повиците за целосен, безусловен прекин на огнот, нудејќи наместо тоа само краткорочни и ограничени примирја.
Киев ја обвинува Русија за систематско кршење на претходните договори.
За време на неодамнешното православно велигденско примирје, Украина забележа над 400 прекршувања од руска страна.
„Разговорите со Украина не ни се приоритет“
Размената на предлози доаѓа во време кога мировните преговори се во застој повеќе од два месеца. Дипломатскиот фокус на Вашингтон во голема мера се префрли кон конфликтот со Иран и кон напорите за негово решавање.
Последните трилатерални разговори (Украина, Русија и САД) се одржаа на 16 февруари. Следната рунда беше одложена непосредно пред американско-израелските напади врз Иран кон крајот на февруари.
Рускиот министер за надворешни работи, Сергеј Лавров, изјави дека разговорите со Украина моментално не се приоритет за Москва.
Каде Украина и Русија се разидуваат?
Големите разлики во ставовите и понатаму го блокираат напредокот, особено во однос на територијалните барања:
Украина смета дека замрзнувањето на моменталната линија на фронтот е најреалната основа за прекин на огнот.
Русија продолжува да инсистира украинските сили да се повлечат од делови на Донбас како услов за каква било спогодба, барање кое Киев категорично го отфрла.
