Претседателот Владимир Путин во петокот оствари телефонски разговор со лидерите на Кина, Индија, Белорусија, Казахстан и Узбекистан за да сподели детали од средбата претходно оваа недела со специјалниот претставник на американскиот претседател Доналд Трамп, Стив Виткоф, пишуваат Москва Тајмс.

Кинескиот претседател Си Џинпинг му рекол на Путин дека Пекинг го поздравува продолжувањето на дијалогот меѓу САД и Русија во преговорите за војната во Украина и дека „секогаш ќе поддржува мир и промовирање разговори“, според кинеските државни медиуми. Сепак, Си предупреди дека „сложените прашања немаат едноставни решенија“.

Индискиот премиер Нарендра Моди напиша на X дека имал „многу добар и детален разговор со мојот пријател претседателот Путин за најновите случувања во Украина “, додавајќи дека тие исто така „го разгледале напредокот во нашата билатерална агенда и ја потврдиле нашата посветеност за понатамошно продлабочување на специјалното и привилегирано стратешко партнерство меѓу Индија и Русија“.

„Со нетрпение очекувам да го угостам претседателот Путин во Индија подоцна оваа година“, рече Моди, потврдувајќи ги претходните извештаи за планираната посета на лидерот на Кремљ.

Белорускиот претседател Александар Лукашенко, исто така, одржа „детални“ разговори со Путин за мировните предлози на САД и плановите за потенцијален самит меѓу Трамп и Путин. Властите во Москва во четврток објавија дека се во тек подготовки за средба лице в лице меѓу двајцата лидери „во наредните денови“, иако американските претставници не ги потврдија тие планови.

Трамп, кој ѝ даде рок на Русија до петок да ја запре тековната војна или да се соочи со нови санкции и „секундарни царини“ врз нејзините клучни трговски партнери, претходно изјави дека „е постигнат голем напредок“ за време на состанокот на Виткоф во Москва. Сепак, кога беше прашан во четврток дали неговиот рок за Путин да се согласи на прекин на огнот е сè уште во сила, Трамп рече: „Ќе зависи од него, ќе видиме што има да каже“.

„Многу сум разочаран“, рече американскиот претседател за Путин, оставајќи атмосфера на неизвесност околу тоа дали тој може да продолжи со својата сè поцврста линија кон Русија додека врши притисок за брз крај на војната во Украина.