Во првите 72 часа откако ја презеде градоначалничката функција, новиот градоначалник на Скопје, Орце Ѓорѓиевски, ја реализираше големата акција за чистење на главниот град, во која беа собрани над четири и пол илјади тони отпад.

Акцијата, во која учествуваа повеќе од две и пол илјади работници, опфати чистење на сите микролокации со контејнери, како и интервенции во речното корито на Вардар, кое, како што истакна Ѓорѓиевски, по долги години конечно тече нормално.

– Плоштадот „Македонија“ е исчистен, кејот беше целосно третиран, исто како и Градскиот парк, Жена парк и сите останати места кои во минатото беа симбол на срам за градот. Нема да дозволам повторно да ја гледаме грдата слика на валкано Скопје – изјави Ѓорѓиевски вечерва на плоштадот по завршувањето на акцијата.

Според него, во изминатите денови биле изречени над 40 казни и 70 опомени – и за физички и за правни лица.

Градоначалникот најави дека контролите ќе продолжат и дека сите кои во иднина несоодветно ќе го одлагаат отпадот ќе се соочат со санкции.