Во дополнителните пет минути, кавадарчани беа по втор пат подобри од Работнички (88:87, 74:74), конечни 2:0 во полуфиналната плеј-оф серија во македонската Прва кошаркарска лига.

Еуро Никел 2005 е првиот финалист оваа сезона во шампионатот и го чека подобриот од втората полуфинална пресметка, МЗТ Скопје Аеродром-Пелистер, во која „металците“ водат со 1:0.

По нецели осум минути игра од вториот меч од полуфиналето на плеј-фот, Еуро Никел 2005 водеше со сосема солидни (21:12). Без особени промени во играта протекна и вториот период од овој меч, Еуро Никел изгради уште повисока предност и до паузата имаше комотни 43:30 на семафорот.

Во вториот дел гостите од Скопје заиграа нешто поангажирано, особено во фазата на нападот. И тоа резултираше со намалување на високата предност на ривалот од Кавадарци. По три одиграни четвртини, Работнички фати приклучок, односно намали на 54:62.

Продолжија да ја бркаат таа не баш ниска негатива. Иако минуваа минутите, не паничеа, и на 03:27 минути пред крајот, по реализацијата на Питс, Работнички дојде и на само „половина поен“ заостанување (69:70), по што мечот во Гевгелија почна да станува и драматичен.

Тоа беше и најава за пресврт, последна која ја испратија „црвено-белите“. Во последната минута стигнаа и до егал резултат. Аска погоди за нерешени (74:74). Но, последниот напад го имаше Еуро Никел 2005. Шансата за финале прво ја промаши Дубински, а некоја секунда подоцна, не погоди ниту Рикиќ. Затоа се играше и продолжение од пет минути…

Во него, екипата од Кавадарци „потегна прва“, поведе со (83:77). Но, рано беше за крај. Дојдоа минутите на Работнички, за серија од (8:1) и прво водство (85:84), на нешто повеќе од една минута до крајот на продолжението. Меѓутоа Рикиќ најде решение во последниот напад, и го врати Еуро Никел 2005 во минимално водство (88:87), кое Питс не успеа да го поништи, па во големото финале и трката за титулата оди Еуро Никел 2005!

Во победничките редови доминираше Соколов со 18 поени (шест скокови), пред Дубински (седум асистенции) и Рикиќ (13 скокови) кои имаат по 16 поени. Значаен придонес имаше и Караколев кој запиша 15 коша..На спротивната страна убедливо најдобар и воопшто на мечот беше Питс со 31 поен (шест скокови, пет асистенции), 12 поени беа дело на Караџовски, 11 имаше Младеновски (четири скокови), а Мулалиќ 10 поени (четири асистенции).