„Пророкот“ Балотели: Крајот на светот се одложува се додека Ливерпул не ја освои титулата
Изјавата на лошото момче на италијанскиот фудбал од 2012 година е вистински хит помеѓу фановите.
Фудбалот е суспендиран за време на кризата поради коронавирусот, а исклучок не е ниту најатрактивното домашно првенство, Премиер лигата.
На девет кола до крајот на сезоната, Ливерпул е лидер на табелата со дури 25 бода повеќе од второпласираниот Манчестер сити и му недостасуваат само шест бода за и математички да ја обезбедат титулата која ја чекаат дури 30 години.
Долгиот период без шампионски трофеј поради кој и го загуби приматот на најтрофејна екипа во Англија (Ливерпул има 18 титули, а Манчестер јунајтед 20), доведе до тоа навивачите на големите ривали да се шегуваат со „црвените“.
Со последните случувања во светот и пандемијата на коронавирусот од која досега се заболени повеќе од 870.000 лица во целиот свет, а се починати повеќе од 43.000 лица, шегата на сметка на Ливерпул на Марио Балотели од 2012 година кога настапуваше за Манчестер сити, сега изгледа засташувачка.
– Крајот на светот се одложува се додека Ливерпул не ја освои Премиер лигата. Според тоа, се чини дека сега сите сме сигурни – изјави Балотели во 2012 година како одговор на тоа дека според календарот на Маите крајот на светот ќе биде на 12 декември 2012 година.