Наградата „Прозарт“, за авторски придонес кон развојот на книжевноста на Балканот, што ја доделува Интернационалниот литературен фестивал „ПРО-ЗА Балкан“, годинава ја доби истакнатиот албански писател Исмаил Кадаре за неговиот импозантен повеќедецениски романсиерски и есеистички опус, високо оценет и од европската и од светската критика.

Поради ситуацијата со пандемијата, Кадаре ја доби наградата во неговиот дом во Париз.

„Се натажив што нема да можам да ја прифатам поканата на фестивалот за лично да ја примам наградата која љубезно ми ја доделивте, но поради моменталната пандемија, се надевам дека ова писмо на благодарност од далечина е доволно. Се разбира дека ми е особено важно дека наградата „Прозарт“ ја велича литература од Балканот и сум почестен што влегувам во друштво на досегашните лауреати на ова признание. Читателите на моите дела може првично ме сметаат за албански писател и тоа е прилично разумно. Тие можеби ме сметаат и за автор кој истражува извесни настани во историјата кои не се важни само за балканскиот регион – Шекспир, грчката трагедија, Втората светска војна, аферата Пастернак“, напиша Кадаре во писмото со кое се заблагодарува за наградата.

Членот на одборот за доделувањето на наградата Александар Прокопиев во „Утрински брифинг“ на „Слободна ТВ“ говореше за авторскиот придонес на Кадаре.

-Тој е еден од најголемите европски, па и светски автори. Познат е по „Генералот на мртвата војска“, која е на нивото најдобрите романи. Во неговите романи има теми кои се во суштина се многу сензибилни, каде се пренесува интелектуалната чистота. Тој е еден од ретките европски автори кој има доследен стил, изјави Прокопиев.