Научнофантастичниот филм „Проектот Очајнички обид“ (Project Hail Mary), со Рајан Гослинг во главната улога, оствари извонреден успех на бокс-офисот уште во првиот викенд од прикажувањето, заработувајќи 80,6 милиони долари во САД. Со тоа, филмот го бележи најсилното отворање за оригинален, нефраншизен наслов годинава.

Глобално, филмот веќе достигна околу 141 милион долари, што го позиционира меѓу најуспешните премиери во 2026 година и потврдува силен интерес кај публиката ширум светот.

Според анализите на филмската индустрија, ова е втор најдобар старт за филм кој не е дел од франшиза, веднаш зад „Опенхајмер“ (Openheimer), што претставува редок успех за оригинална приказна во современиот холивудски пазар.

Филмот, кој е во режија на Фил Лорд и Кристофер Милер, постави и неколку дополнителни рекорди, меѓу кои и најуспешно отворање за продукција на „Амазон Ем-Џи-Ем студиос“, како и најдобар старт во нивната режисерска кариера.

„Проектот Очајнички обид“ е базиран на истоимениот роман на Енди Вир и ја следи приказната за астронаут кој добива мисија да го спаси човештвото од глобална катастрофа.

Професорот по природни науки Рајленд Грејс (Рајан Гослинг) се буди на вселенски брод, оддалечен светлосни години од Земјата, без сеќавање за тоа кој е и како се нашол таму. Како што неговата меморија постепено се враќа, тој почнува да ја открива својата мисија – да ја реши мистеријата зад непознатата супстанција што го загрозува Сонцето и го доведува во прашање опстанокот на животот на Земјата. Соочен со речиси невозможна задача, Грејс мора да се потпре на своето научно знаење, интуиција и неконвенционални решенија за да спречи глобална катастрофа. Но, во текот на мисијата, се појавува неочекувано пријателство кое му дава надеж дека овој предизвик нема да мора да го издржи сам.

Филмот комбинира научна фантастика со емотивна нарација, што беше позитивно прифатено и од критиката и од публиката.

Во првите денови од прикажувањето, филмот го погледнале околу пет милиони гледачи, при што значителен дел од приходите доаѓа од премиум формати како „Ајмакс“, што укажува на силна побарувачка за големо платно и визуелно искуство.