Подуцентската куќа на Милчо Манчевски „Банана филм“ поднесе кривични пријави против раководството на Агенцијата за филм. Како што велат од продукцијата, сите опфатени во кривичната пријава остварувале противправна лична корист од своите незаконски постапки.

„Банана филм”, продуцентската куќа на најтрофејниот македонски режисер Милчо Манчевски, поднесе кривични пријави против финансискиот советник на Агенцијата за филм, Бранко Петровски, против претседателот на Управниот одбор Игор Шокаровски и против членката на Управниот одбор, правникот Снежана Станковиќ. Тие најавуваат уште кривични пријави, се вели во соопштението.

Тие ги повикаа министерката за култура, Бисера Костадиновска-Стојчевска, вицеприемерката за борба против корупција Славица Грковска, вицепремиерот Артан Груби и премиерот Ковачевски да го казнат криминалот во редовите на владејачката коалиција и на институциите кои таа ги контролира, како што е Агенцијата за филм.

Ја поздравуваме акцијата на американскиот Стејт департмент и во тој дух ги повикуваме и засегнатите страни од меѓународната заедница кои досега предупредуваа за корупцијата во Македонија да се посветат на овој конкретен случај затоа што зад него се кријат многу незаконити работи – велат од продуцентската куќа.

Од Банана филм велат дека финансискиот советник Петровски се обвинува за злоупотреба на службена положба која произлегува од конфликт на интереси. Станковиќ и Шокаровски се теретат за донесување одлуки на Управниот одбор на Агенцијата за филм кои се противзаконски.

Поради индиции изнесени во ревизорскиот извештај на Државниот завод за ревизија, „Банана филм” побара и од Финансиска полиција да изврши увид во работата на ДФРМ, но и на шест фирми во директна и индиректна сопственост (преку нивните семејства) на претседателот на Друштвото Игор Иванов-Изи од династијата Иванови и секретарот на друштвото Томислав Салковски, како и на нивните политичките заштитници. „Банана филм” достави барање и до Комисијата за заштита на конкуренција да ја испита недозволената државна помош од Агенцијата за филм до ДФРМ, која веќе беше констатираната во извештајот на Министерството за култура од 2020, но и во новиот извештај на ДЗР, со барање таа да се укине и да се вратат досега противзаконски доделените 120.000 евра од државна каса до ДФРМ, се вели во соопштението.

Сознанијата врз кои се базираат кривичните пријави, од продуцентската куќа велат дека произлегуваат од наодите на ДЗР, ДКСК, извештаи и инспекции при Министерството за култура и Транспаренси интернешнл.

Додаваат дека пондесени се и две тужби против Агенцијата за филм поради нанесување штета на продуцентската куќа.