Привремено затворени две училишни кујни и магацин во Карпош откако девет деца се заразија со салмонела
Државниот санитарен и здравствен инспекторат спроведе вонреден инспекциски надзор и привремено ги затвори централниот магацин на ДПТУ Ванила фоод“ – ДООЕЛ Скопје од каде се снабдуваат со храна кујните во училиштата во Карпош и училишните кујни на ООУ „Димо Хаџи Димов“ и ООУ „Владо Тасевски“, откако вчера кај девет ученици е потврдена салмонела.
Вонредниот инспекциски надзор е извршен во соработка со Агенција за храна и ветеринарство, ЈЗУ Центар за јавно здравје и ЈЗУ Институт за јавно здравје. Согласно надлежностите на ДСЗИ земени се брисови од работни површини а од страна на АХВ примероци од храна од централниот магацин и кујните. Посетените објекти се времено затворени – соопштија од ДСЗИ.
Од Инспекторатот најавија дека денеска продолжува инспекцискиот надзор во училишните кујни на ООУ „Војдан Чернодрински“ и ООУ „Јан Амос Коменски“.
Врз основа на епидемиолошките анкети, стручното мислење како и препораки на епидемиолози од ЈЗУ ЦЈЗ – Скопје и ЈЗУ ИЈЗ-Скопје, ДСЗИ и понатаму ќе биде дел од координираните инспекциските надзори а се со цел да се спречи ланецот на ширење на заразното заболување – се додава во соопштението.
Клуч на врата за училишните кујни во Карпош: 9 деца заразени со салмонела