Откако во првото коло со 5:0 го совлада Кардиф од Велс, денеска футсалците на Шкупи беа уште поубедливи триумфирајќи над претставникот на Андора, Енкамп, со конечен резултат 11:1.

По три погодоци запишаа Сулејман (05:34, 06:35, 23:41 мин.) и Сефери (10:22, 17:59, 31:14), по еден Глигоров (09:09), Петровиќ (19:45), Шабани (29:36) и Исмаили (35:11), а автогол си постигна Сан Сегундо (25:40).

На спротивната страна единствениот гол беше дело на Неира (34:17). Претходно на стартот од второто коло во групата Б Даугавпилс беше подобар од Кардиф со 5:1.

Ова значи дека за првото место кое води во главната рунда, битка ќе водат Шкупи и летонската екипа на Даугавпилс, дуел кој што е закажан за в сабота со почеток од 20.00 часот.

Доколку Шкупи биде првопласиран, на турнирот кој што ќе се организира во октомври во Хрватска, освен домаќинот Ново Вријеме ќе се најдат уште победниците од прелиминарната група Д (Омонија, Гази Университеси, Пинерола Братислава, Ваенгир Јупитерс) и од прелиминарната група И (Гентофте, Лео, Титоград).