Македонската јуниорска кошаркарска репрезентација „Под 18“ загуби и од Естонија со 90:99 во натпреварот за пласман од 13 до 16 позиција на Европското првенство дивизија „Б“ во Португалија.

Противникот успеа да стекне предност по 10 минути игра (26:19), а подоцна истата стана и „двоцифрена“ (35:23). Нашите кошаркарски надежи во следниот период играа подобро во нападот. Намалија на 30:36 по поентирањето на Шошкиќ, во средината на втората четвртина. Серијата од 9:1 ја продолжи Луканоски, за уште пониски 32:36.

По тајм-аутот на Естонија не дозволи пресврт и до крајот на полувремето ја врати својата предност, одново на „двоцифрена“ (51:41). Луканоски беше играчот кој „повлече“ на почетокот на второто полувреме. Стартната негатива (44:57), со нова мини-серија (8:0) ја намаливме на 52:57.

Не помогна новиот тајм-аут на естонскиот селектор, реализиравме уште два поени, за само 54:57 на семафорот. По тројката на Величковски, Македонија дојде до нерешен резултат (61:61), а Величковски беше играчот кој, по подолго време ни донесе и водство, макар и минимално, (64:63). Но, во периодот на одлука Естонија беше репрезентацијата која влезе со предност од 71:67, и успеа да ја задржи и на крајот да победи!

Григориј Јакимовски го одигра својот најдобар натпревар на првенството. Имаше учинок од 30 поени (9/10 во шутот од поле и 11/12 од линијата за слободни фрлања), три асистенции и два скока. На последниот ден од шампионатот во Матошинос, Македонија ќе игра против Украина денеска од 16.30 часот.