Чешката тенисерка Маркета Вондроушова, шампионка на грен слем турнирот Вимблдон во 2023 година, се соочува со суспензија до четири години откако беше обвинета за кршење на антидопинг правилата со одбивање да се подложи на тестирање.

Спорниот инцидент се случил во декември за време на ненајавено тестирање надвор од натпреварувањето. Вондроушова тврди дека непознато лице заѕвонил на нејзината врата по 20.00 часот, одбило да се идентификува и побарало итен примерок од урина. Во тој момент, таа одбила да го пушти внатре, опишувајќи ја ситуацијата како сериозно нарушување на приватноста.

Потоа таа беше обвинета од Меѓународната агенција за тениски интегритет за „одбивање или недавање примерок без оправдана причина откако била известена од овластено лице“.

Шампионката на Вимблдон во 2023 година ја даде својата верзија на настаните на социјалните мрежи, нагласувајќи дека дејствувала од страв, а не со намера да избегне тестирање.

– Кога некој ќе ви заѕвони на врата доцна навечер без јасно да се идентификува и да ја следи постапката, реагирате како личност која е исплашена. Во тој момент, стануваше збор за чувство на безбедност, а не за избегнување на ништо – рече Вондроушова.

Според правилата на Светската антидопинг агенција, тенисерките мора редовно да ја пријавуваат својата локација и да одвојат еден час дневно за потенцијално тестирање, но тестовите можат да се спроведуваат и надвор од тој период. Вондроушова не играла поединечно од јануари поради повреда на рамото, но неодамна играла во двојки за Чешка. Нејзиниот следен закажан турнир е Мастерс во Мадрид, кој започнува на 20 април.