Чед Хуго, поранешен член на „Нептунс“, повторно го тужи својот продуцентски партнер Фарел Вилијамс, познат музичар и моден дизајнер. Хуго тврди дека Вилијамс му должи милион долари за еден од албумите на групата „Н.Е.Р.Д.“, која двајцата ја основаа со Шеј Хејли во 1992 година, пишува „Ролинг стоун“.

Адвокатите на Хуго поднесоа тужба против Вилијамс, тврдејќи дека имало „систематско негирање“ на авторските права и правата на Чед како партнер во „Нептунс“ и „Н.Е.Р.Д.“, поточно во врска со албумот „No One Really Dies“ од 2017 година.

– Вилијамс ги следел своите интереси, криел материјални информации и пренасочувал приходи што му припаѓале на тужителот. Таквото намерно, измамничко и злонамерно однесување бара доделување казнена отштета – напишал адвокатот Брент Џ. Леман во тужбата.

– По години прикривање од страна на Фарел и неговиот тим, г-дин Хуго немаше друг избор освен да бара значителна штета и одговорност на суд. Со нетрпение очекуваме да презентираме докази и да ја побараме целосната заштита што ја нуди законот – додал тој.

Чед претходно го тужеше својот колега, во 2024 година. Во таа тужба, тој тврдеше дека Фарел „измамнички“ се обидел да добие ексклузивна контрола врз трговските марки поврзани со нивната продукција и работа на пишување песни како „Нептунс“. Тој тврдеше дека Вилијамс регистрирал три одделни трговски марки за „Нептунс“ без да го вклучи Хуго, наводно кршејќи го нивниот долгогодишен договор за подеднакво споделување на сè.

Хјуго и Вилијамс продуцираа и напишаа некои од најголемите хитови од 2000-тите како „Нептунс“, вклучувајќи ги „Drop It Like It’s Hot“ на Снуп Дог, „Rock Your Body“ на Џастин Тимберлејк и „Hollaback Girl“ на Гвен Стефани. Тие ги продуцираа своите последни песни заедно во 2022 година, истата година кога беа примени во Куќата на славните на текстописците.

Откако Чед ја поднесе својата прва тужба, Фарел во едно интервју рече дека тие повеќе не разговарале.

ФОТО+ВИДЕО | Фарел Вилијамс го има најтенкиот часовник на светот: Чини вртоглави 1,7 милиони евра