Полициски наредник беше убиен во неделата вечерта во Охајо додека одговарал на пријава за провала и пукање во куќа. Осомничениот и уште двајца загинаа во инцидентот, објавија властите. Во пукањето во Ритман, град на околу 60 километри јужно од Кливленд, повредени се уште четири полицајци и полициско куче, пишува „Асошиејтед прес“.

„Штом пристигнале на местото на настанот, кон полицајците веднаш бил отворен оган“, изјавија во заедничка изјава началникот на полицијата во Ритман, Роберт Шоуз, и шерифите на округот Вејн и Медина.

Во соопштението за медиумите се наведува дека е убиен наредникот Скот Рис, 54-годишен ветеран со десет години искуство во полициската станица Ритман. Пред тоа, тој служел како заменик шериф во округот Вејн и како полицаец во Шугар Гроув.

Тројца од ранетите полицајци се членови на канцеларијата на шерифот на округот Медина, а четвртиот е од полициската станица Хинкли. Двајца беа префрлени во болница и се во стабилна состојба, додека другите беа згрижени на местото на настанот. Полициското куче е во сериозна состојба.

Имињата на осомничениот и другите мртви, како и околностите на нивната смрт, не се објавени. Сепак, Канцеларијата за алкохол, тутун, огнено оружје и експлозиви објави дека поранешната партнерка на осомничениот и нејзиното дете се меѓу мртвите.

Гувернерот на Охајо, Мајк ДеВајн, во понеделник нареди американските и државните знамиња да бидат спуштени на половина копје во сите јавни згради во округот Вејн, како и во Државната куќа и две други државни згради. Знамињата ќе останат на половина копје до зајдисонце на денот на погребот на Рис.

„Ги повикуваме сите жители на Охајо да ги држат нашите мисли и молитви со семејството, пријателите и колегите на нашиот паднат херој додека се справуваат со оваа незамислива загуба“, се вели во соопштението на Братскиот ред на полицијата на Охајо.

Масовно пукање во близина на средно училиште во САД, најмалку двајца мртви