Португалија и Шпанија вечерва ќе ги одмерат силите во големото ибериско дерби во осминафиналето на Светското првенство, во Арлингтон. За селекторот Роберто Мартинез ова е последен голем турнир на клупата на Португалија, па победа над актуелниот европски шампион би била круна на неговиот мандат. Шпанија, пак, се стреми кон втора светска титула, по онаа од 2010 година.

Пат до осминафиналето

Португалија заврши втора во групата К, убедливо победи со 5-0 против Узбекистан, а ремизираше 0-0 со Колумбија и со ДР Конго 1-1, а потоа во нокаут-рундата избори тесна и драматична победа од 2-1 против Хрватска со погодок на Гонсало Рамош во 94. минута. Роналдо постигна три гола на турнирот, меѓу кои и пенал против Хрватска, што беше прв негов погодок во елиминациски натпревар од Светските првенства.

Шпанија ја освои групата Х многу поубедливо. Ја победи Саудиска Арабија со 4-0, Уругвај со 1-0 и одигра 0-0 против Зеленортските Острови. Во нокаут-фазата победија со 3-0 против Австрија. Ламин Јамал досега има постигнато еден гол, додека Микел Ојарзабал е прв стрелец на Шпанија со четири погодоци.

Меѓусебна историја

Двете селекции играле меѓусебе 42 пати, со поблаг биланс во корист на Шпанија. На Мундијалите, последен пат се сретнале во 2018 година во Сочи, а натпреварот заврши 3-3, Роналдо постигна хет-трик за Португалија, а за Шпанија два гола постигна Диего Коста и еден Начо. Минатата година се сретнаа и во финалето на Лигата на нации, каде победи Португалија. Во последните шест меѓусебни дуели, четири завршиле со најмногу два гола вкупно, што укажува на изразено тактички, затворени натпревари.

Ниту еден тим нема суспензии или нови повреди. Кај Португалија, единствена дилема е физичката подготвеност на Витиња и Бруно Фернандеш, двајцата беа извадени од игра во околу 60. минута против Хрватска. Кај Шпанија, единствен играч под прашалник е Нико Вилијамс кој се враќа по повреда, но се очекува да биде опција од клупата.

Предвидени состави

Се очекува Португалија да излезе на теренот во формација 4-2-3-1: Диого Кошта; Жоао Кансело, Ренато Веига, Рубен Дијаш, Нуно Мендеш; Витиња, Жоао Невеш; Педро Нето, Бруно Фернандеш, Рафаел Леао; Роналдо.

Шпанија, пак во 4-3-3: Унаи Симон; Педро Поро, Пау Кубарси, Емерик Лапорт, Марк Кукуреља; Родри, Педри, Дани Олмо; Ламин Јамал, Микел Ојарзабал, Алекс Баена.

Клучната битка ќе се одвива во средниот ред, не по крилата. Шпанија ја гради играта врз доминација на топката преку триаголникот Родри–Педри–Дани Олмо, а откако ќе воспостават посед, ќе ги користат Јамал и Баена во дуели еден-на-еден против бековите. Овој систем сега за првпат ќе се судри со подеднакво квалитетен среден ред – Жоао Невеш-Бруно Фернандеш-Витиња. Со визијата, креативноста и прецизните додавања на Бруно Фернандеш, Португалија поседува оружје што досега Шпанија не го сретна на Мундијалот.

Португалија е најопасна токму кога Фернандеш добива простор меѓу линиите за брзо да ги проигра напаѓачите, но Родри, е еден од најдобрите дефанзивни играчи за врска во светот. Ако Невеш и Витиња успеат да ги освојуваат вторите топки и брзо да ја пренесат играта нанапред, крилата Леао и Нето ќе можат да ја казнат високата одбрана на Шпанија; ако Шпанија наметне контрола на поседот, Португалија ќе биде принудена долго да се брани.

Последниот танц на Роналдо?

На 41-годишна возраст, Кристијано Роналдо и натаму е највлијателната фигура во португалската репрезентација, не толку поради својата игра на теренот, колку поради својата харизма и легендарен статус. Иако повеќе не е експлозивниот напаѓач од најдобрите години, неговото присуство сè уште привлекува огромно внимание и влијае врз играта на целиот тим.

Уште пред почетокот на турнирот се шпекулираше дека Светското првенство во 2026 година би можело да биде неговото последно во кариерата. Додека самиот Роналдо избегнуваше да зборува за иднината, неговата сестра изјави дека по завршувањето на Мундијалот, тој ќе се повлече од настапите за репрезентацијата.

Тоа значи дека секој следен нокаут-натпревар за Португалија носи дополнителна тежина – евентуален пораз од Шпанија би можел да стави крај на една од најголемите репрезентативни кариери во историјата на фудбалот.

Роналдо освои речиси сè што можеше на клупски и репрезентативен план, но доколку Португалија биде елиминирана, неговата богата колекција на трофеи ќе остане без единствениот кој никогаш не успеа да го освои – светската титула.

За Јамал, Светското првенство почнува сега

Повредата на задната ложа накратко го доведе во прашање неговиот настап на Мундијалот, но Ламин Јамал успеа да се врати и постепено станува една од главните ѕвезди на турнирот во Северна Америка.

Одличниот настап против Австрија, кога беше прогласен за играч на натпреварот, уште еднаш го потврди неговиот огромен потенцијал, две години по блескавите партии со кои ѝ помогна на Шпанија да го освои Европското првенство во 2024 година.

Прогноза

Според симулациите на суперкомпјутерот на „Opta“, Шпанија има 49,2 проценти шанси да победи во регуларните 90 минути.

Шансите на Португалија за победа во регуларниот дел изнесуваат 25,6 проценти, додека веројатноста натпреварот да замине во продолженија е 25,2 проценти.

Шпанија влегува како благ фаворит, како потактички стабилна и дефанзивно посигурна репрезентација, како и репрезентација со повеќе самодоверба по убедливата победа над Австрија, за разлика од Португалија која се измачи против Хрватска. Сепак не може да ја отпишеме Португалија, индивидуалниот квалитет на португалскиот состав, а особено присуството на Роналдо во шеснаесетникот, го прави натпреварот целосно отворен. Се очекува тврд, тактички и физички натпревар во кој една инспирација или една грешка може да го одлучи победникот.

Тухел ја прозва ФИФА по случајот со Балогун: „Можеби Хари Кејн треба да му се јави на Трамп за црвениот картон на Кванса“