Државите ширум светот почнаа делумно да ги укинуваат своите рестриктивни мерки, балансирајќи помеѓу ризикот од заразата и враќањето во погон на своите економии.

Британскиот премиер Борис Џонсон се врати на работа откако и самиот го прележа ковид-19. Тој пред камерите се појави видливо послаб и со подолга коса.

Пандемијата на коронавирус досега усмрти повеќе од 207.000 луѓе ширум светот, а заразени се скоро три милиони луѓе, според податоците на Универзитетот Џон  Хопкинс. Најмногу заразени има во САД.

Најбогатите европски земји известуваат за пад на дневната бројка на смртни случаи, надевајќи се дека најлошиот дел од епидемијата е зад нив.

Данска дозволи да се отворат фризерските салони. Отворени се и стоматолошките ординации, физиотерапетските салони, автошколите, а дозволена е дури и нова тетоважа.

Италија и државата Њујорк во САД ги изнесоа првичните планови за враќање на животот во нормала, а се очекува истото неделава да го сторат и Франција и Шпанија.

Во Швајцарија денеска продавниците беа отворени, а  учениците во Норвешка се вратија во основните училишта.

Сепак, британскиот премиер Џонсон предупредува дека е рано Велика Британија да ги олесни своите рестриктивни мерки. Во своето прво обраќање до јавноста после неколку недели, 55-годишниот лидер рече дека не може „да ја отфрли целата напорна работа и жртвување на британскиот народ и да ризикува уште едно големо ширење на инфекцијата“.

Досега во Велика Британија починаа 20.000 луѓе, а владата на Џонсон сè уште е критикувана дека доцна започнала со воведувањето на мерките.

Економските прогнози предвидуваат најголем економски пад од Големата депресија во 1919 година, во време кога цената на нафтата исто така беше на екстремно ниско ниво.

Во Соединетите Американски Држави, претседателот Доналд Трамп два дена не ја одржува својата дневна прес-конференција, жалејќи се дека тоа нема никаква смисла, сојузните држави со голема брзина стават крај на воведените мерките, кои милиони луѓе оставија без работа.

Страв и нетрпеливост

Европските влади кои веќе ги објавија своите планови за ублажување на мерките се соочуваат со стравови и нетрпеливост од општеството.

Во Италија, католичките свештеници се бесни поради продолжување на забраната за собирање на поголема група луѓе, а некои учители во Франција стравуваат дека враќањето на учениците во училиштата на 11 мај, би можело да биде премногу ризично.

Германија започна да ги укинува мерките минатата недела, а некои граѓани се нетрпеливи поради мерките кои остануваат на сила. Сè уште има мали, дневни протести против ограничувањата на личните слободи.

Гувернерот на Њујорк ги истакна плановите за постепено отворање на економијата. Тој најави дека дел од фирмите за производство и градежништво може да се вратат на работа на 15 мај.

Дел од сојузните држави со кои раководат конзервативци го забрзаа пристапот. Пример е Џорџија, која, спротивно на советите на здравствените работници и ставот на Трамп, дозволи повторно да работат илјадници бизниси и канцеларии, исто така и Оклахома, која од мај дозволи работа на рестораните и кината.

Гувернерот на Џорџија беше критикуван, поради неговата одлука за отворање на бизнисите, од неговиот партиски колега, претседателот Доналд Трамп.

Во Швајцарија, од денеска на голем број сектори им е дозволено да работат, вклучувајќи ги стоматолозите и фризерите, а Нов Зеланд исто така се подготвува за излез од карантинот.

Во Кина, по неколку месеци пауза, средношколците се вратија во клупите во Пекинг и Шангај.

Кина тврди дека бројот на заразени драматично се намалил откако коронавирусот се појави таму кон крајот на минатата година.

Но, сè уште постои страв од втор бран на заразата и случаите кои доаѓаат од странство.

Учениците во Пекинг мора да ја измерат температурата пред да влезат во училиште и мора да имаат „зелен“ здравствен код на апликација, што пресметува колку е голем ризикот од инфекцијата за тоа лице.

Во потрага по нова нормала на секојденевието

Додека научниците се натпреваруваат да го пронајдат лекот и вакцината за коронавирусот, државите експериментираат со пристапот за безбедно продолжување на секојдневниот живот и покрај пандемијата.

Неколку земји планираат да воведат апликација што ќе ги предупредува корисниците дека се во близина на некој кој е позитивен на коронавирусот.

Речиси два милиони Австралијци веќе ја инсталирале апликацијата на своите паметни телефони, и покрај загриженоста дека технологијата ја нарушува нивната приватност.

Премиерот на Италија, Џузепе Конте предупреди дека жителите ќе треба да носат маски и строго да ги применат мерки за социјална оддалеченост кога на 4 мај ќе се укинат сегашните ограничувања.

Италија влегува во ера на „одговорност и соживот со вирусот“, рече Конте во обраќање до нацијата.

Во исто време, милиони муслимани во светот се навикнуваат да го одбележат Светиот мецес Рамазан без да се молат во џамиите и без големи семејни собири.

Саудиска Арабија делумно ги укина ограничувањата, но најави дека светиот град Мека останува затворен.

Исто така, постојат земји кои не воведоа никакви мерки поради пандемијата.

Пример е изолираниот Туркменистан, држава во централа Азија, една од ретките земји што тврди дека нема случаи на инфекција.