Перформансите „Општествена критика“ и „Самовили и демони“ на Бобан Русески од Скопје и „Пат до месечината“ на Раде Обрадовиќ од Нови Сад на 9 април ќе го отворат патот на Фестивалот „Танц фест Скопје“ кон полнолетството.

Со мото „Танцувајќи на работ“ од 9 до 20 април ќе се одржат девет вечери во рамките на програмата на 18. „Танц фест“. Големо финале на програмата ќе биде доделувањето на наградата „Менада“ и настапот на танцовата компанија „Марта Греам“ од Њујорк, САД.

Наградата „Менада“ за врвни остварувања во областа на танцот ќе ѝ биде доделена на актуелната уметничка директорка на компанијата, Џенет Ајлбер, на сцената на Македонскиот народен театар, на 20 април, во 20 часот.

– Горда сум што фестивалот, на својот 18 роденден, успеа да ја донесе оваа извонредна компанија во Скопје, со што ќе ѝ овозможи на својата публика уникатно задоволство да ги види креациите на Марта Греам, создадени во 1937, 1942, 1957 и 1981 година, како и креациите што ги создаваат новите кореографи инспирирани од нејзиното творештво.

Публиката на „Танц фест Скопје 2022“ е една од ретките што ќе имаат ексклузивна можност да ја видат компанијата на Греам и уникатното историско наследство, како сведок на стогодишниот развој на современиот танц во живо, за што огромна благодарност искажуваме за поддршката на Американската амбасада во Скопје и на фондацијата „American Dance Abroad“ – вели уметничкиот директор на „Танц фест Скопје“, Рисима Рисимкин.

(Текстот е објавен во „Културен печат“ број 124, во печатеното издание на весникот „Слободен печат“ на 9-10 април 2022)