Американско-шведската актерка Меј Брит, една од препознатливите холивудски ѕвезди од 1950-тите и 1960-тите години и поранешна сопруга на легендарниот забавувач Семи Дејвис помладиот, почина на 91-годишна возраст. Веста за нејзината смрт ја потврди нејзиниот син, а актерката починала од природна смрт на 11 декември во медицинскиот центар „Провиденс Сидарс-Синаи Тарзана“ во Калифорнија, пренесува „Дејли мејл“.

Меј Брит остана запаметена по улогите во филмовите „Синиот ангел“, „Младите лавови“ и „Murder, Inc.“, како и по телевизиските настапи, меѓу кои и во популарната серија „Невозможна мисија“. Иако со текот на времето нејзината филмска кариера забави, нејзиното влијание врз златната ера на Холивуд остана значајно.

Родена како Мајбрит Вилкенс на 22 март 1934 година во Лидинге, Шведска, таа пораснала во скромно семејство. Нејзиниот животен пресврт се случил кога имала само 18 години, додека работела како асистентка на фотограф во Стокхолм, каде што ја забележал легендарниот италијански продуцент Карло Понти. Тој момент ѝ ги отворил вратите на филмската индустрија – најпрво во Италија, а потоа и во Холивуд, каде што во 1957 година потпишала договор со студиото „20th Century Fox“.

Една од нејзините најзначајни улоги била онаа на кабаретската пејачка Лола-Лола во римејкот на филмот „Синиот ангел“ од 1959 година, со која го зацврсти својот статус на холивудска ѕвезда. Голем успех оствари и во воената драма „Младите лавови“, каде што глумеше заедно со Марлон Брандо.

Посебно внимание во јавноста привлече нејзиниот брак со Семи Дејвис помладиот, со кого се венча во 1960 година. Во тоа време нивната врска беше исклучително контроверзна, бидејќи меѓурасните бракови сè уште беа забранети во голем број сојузни држави во САД. И покрај притисоците и критиките, двојката остана заедно осум години, доби ќерка по име Трејси, а подоцна посвои и двајца синови.

Бракот заврши во 1968 година, по што Меј Брит постепено се повлече од центарот на филмската индустрија, иако повремено се појавуваше на телевизија. Подоцна, со емоции зборуваше за својот однос со Дејвис, истакнувајќи дека е благодарна што имала можност да биде во брак со човекот што го сакала.

Во приватниот живот, таа повторно стапи во брак во 1993 година со Ленарт Рингквист, со кого остана до неговата смрт во 2017 година. Трагично, нивната ќерка Трејси почина во 2020 година, на 59-годишна возраст.

Меј Брит зад себе остави синови, сестра и шест внуци. Со нејзиното заминување, Холивуд се прости од една од последните актерки што ја обележаа златната ера на светската кинематографија.