Американскиот актер Тони Сирико, најпознат по улогата во серијата „Сопранови“, почина вчера на 80-годишна возраст.

Сирико е најпознат по улогата на Поли Гвалтиери, познат како „Поли Вонатс“, еден од поручниците на семејството Сопрано.

Тој на совршен начин го одглуми простиот и по малку нестабилен мафијаш, кого публиката го обожаваше поради неговите духовити забелешки.

Тони Сирико е Американец со италијанско потекло роден на 29 јули 1942 година во Бруклин, Њујорк.

Во младоста често имал проблеми со законот, а првпат бил уапсен кога имал седум години поради кражба во продавница.

Во шеесетите години беше поврзан со мафијата и беше познат по прекарот „Јуниор“.

Тој бил апсен вкупно 28 пати, а два пати бил и осуден, првиот пат за недозволено носење огнено оружје, а вториот за учество во вооружен грабеж.

Интерес за глума пројавува уште во текот на служењето на втората затворска казна во затворот „Синг Синг“, поточно кога затворот го посетувала патувачка група актери наречена „Театар на заборавените“, која главно била составена од поранешни затвореници.

Првата улога ја одигра во филмот „Лудиот Џо“ во 1974 година. Во текот на својата актерска кариера, тој се појави во неколку филмови кои беа успешни и кај критиката и во поглед на заработката, меѓу кои „Мртви претседатели“ од 1987 година и „Добри момчиња“ од 1990 година.