Почина Еди ван Хален – Синот се збогуваше со легендарниот гитарист!
На 65-годишна возраст денес почина Еди Ван Хален, еден од основачите на легендарната хард рок група Ван Хален. Ван Хален долго се борел со рак на грлото, а веста за неговата смрт ја сподели неговиот син Волфганг.
„Не можам да поверувам дека го пишувам ова, но татко ми, Едвард Лодевик Ван Хален, утрово ја изгуби долгата и мачна битка со ракот. Тој беше најдобриот татко што можев да го замислам. Секој момент што го поминавме заедно на сцената или надвор, беше подарок. Срцето ми е скршено и не мислам дека некогаш ќе се опоравам од оваа загуба. Те сакам, тато”, напиша Волфганг.
— Wolf Van Halen (@WolfVanHalen) October 6, 2020
Еди се борел со ракот повеќе од една деценија, објавува ТМЗ. Како што наведуваат, тој минатата година бил неколку пати во болница, а неодамна бил на хемотерапија.
Но и покрај тоа, тој продолжил да присуствува на концертите и да вежба со неговиот син Волфганг, кој стана басист на Ван Хален во 2006 година.
Уште како дете покажал голема музикалност, а на гитарата и е посветил од 12-та година. Тој важи за еден од најдобрите рок гитаристи на сите времиња, а славата ја стекна со групата Ван Хален, која ја основаше со неговиот брат Алекс во 1972 година.
