Во текот на изминатата недела во Македонија е регистриран уште еден смртен случај поврзан со компликации од грип. Станува збор за 62-годишен маж од Тетово, кој бил хоспитализиран на инфективното одделение во тетовската клиничка болница.

Кај починатиот биле утврдени повеќе хронични заболувања, не бил вакциниран против сезонски грип, а лабораториски е потврден вирусот инфлуенца А (H3).

Институтот за јавно здравје соопшти дека од 26 јануари до 1 февруари, пријавени се 1.498 случаи на грип и заболувања слични на грип. Тоа е за над 12 проценти помалку во споредба со претходната недела и речиси двојно помалку во однос на истиот период лани.

Активноста на вирусот во моментов се оценува како ниска, но грипот и понатаму е присутен во повеќето делови од државата. Најмногу заболени има во Скопје, Прилеп и Струмица, додека во Берово, Делчево и Крива Паланка минатата недела не е пријавен ниту еден случај.

Најмногу заболени се лица на возраст од 15 до 64 години, но највисока стапка на заболување и натаму се бележи кај најмалите деца, на возраст до четири години. Висока активност на грипот е регистрирана во Охрид, Дебар и Гевгелија, додека во поголем дел од земјата активноста е сезонска или средна.

Од почетокот на сезоната досега, вкупно се регистрирани 11.415 случаи на грип и заболувања слични на грип, а бројот на починати лица поврзани со грип изнесува четири. Од Институтот за јавно здравје повторно апелираат граѓаните, особено хронично болните, постарите и родителите на мали деца, навреме да побараат лекарска помош и да не го потценуваат грипот.

ВИДЕО | На Инфективна клиника почина пациент од грип