Сара Бенет, мајка на две деца која на Инстаграм ја документираше својата борба со ALS, почина на 39-годишна возраст. Таа самата ја објави својата смрт преку однапред напишана порака, со која на трогателен начин се прости од повеќе од 100 илјади следбеници. Заедно со насмеана фотографија, оваа мајка остави порака што сведочи за нејзината неверојатна сила и прифаќање на судбината, пренесува „Е њуз“.

 

View this post on Instagram

 

A post shared by Sara Bennett (@theanandapivot)

И покрај тешката прогноза, инфлуенсерката Сара Бенет пронајде нова смисла и цел во едукацијата на другите. На своите следбеници им порача: „Јас сум учителка, мојот план е да ве едуцирам.“ На својот профил отворено ги споделуваше сите аспекти од животот со амиотрофична латерална склероза (ALS) – од тешките моменти и физичките ограничувања, до драгоцените мигови поминати со сопругот Расти, со кого беше во брак повеќе од 11 години, како и со синовите Линколн (9) и Вилијам (7).

„Не чувствувам болка, не сум уморна. Можам да се смеам, да зборувам и да се движам. Кога размислувам за последните месеци од мојот живот, ми е драго што не заминав ненадејно, и покрај целата болка. Ја исполнив мојата листа“, напиша Бенет во својата порака пред да почине.

Пораката ја заврши со зборови што одразуваат длабока благодарност: „Дури и ако не верувате во ништо, јас ја хранам земјата и моето дрво. Го сакав овој живот и сум благодарна за времето што го имав“

Нејзината објава силно одекна на социјалните мрежи, каде илјадници луѓе ѝ оддадоа почит, трогнати од храброста на жената која својата борба со тешката болест ја претвори во извор на инспирација за другите.

Патот на Сара Бенет на социјалните мрежи започна во 2020 година, кога го отвори профилот „The Ananda Edit“ за да ја промовира својата работа како професионален организатор на простор. Но нејзиниот живот целосно се промени во март 2023 година, кога ѝ беше дијагностицирана амиотрофична латерална склероза (ALS), прогресивна невродегенеративна болест.

Наместо да се повлече од јавноста, Сара донесе храбра одлука. Таа го промени името на профилот во @TheAnandaPivot и започна нова мисија – да ја документира својата борба и да ја подигнува свеста за болеста.

„Светот ми се преврте наопаку. Имаше толку многу лични работи што требаше да се направат, толку многу поврзани со болеста. Кога помислив на мојата работа, почувствував потреба да го избришам профилот и да исчезнам. Но тоа ќе беше само уште една работа што оваа болест ќе ми ја одземеше“, објасни таа во една од своите објави, покажувајќи неверојатна решителност да не дозволи болеста да ја дефинира.