Светската поп-ѕвезда Аријана Гранде официјално го потврди своето враќање на музичката сцена. По неколкунеделните мстериозни објави, 32-годишната пејачка го откри името на својот нов албум, датумот на објавување и првите промотивни фотографии, пишува “Дејли мејл“.

Новиот студиски албум на Аријана насловен „Petal“ ќе биде објавен на 31 јули. Пејачката на својот Инстаграм профил сподели црно-бела фотографија на која позира со насмевка, со краток опис: „petal 7.31“.

За визуелниот идентитет на овој проект, Гранде повторно соработува со креативната директорка Катија Темкин, која е задолжена за комплетниот дизајн, фонтот и пакувањето на физичките изданија на албумот.

Иако фановите се возбудени за новата музика, Аријана ги шокираше сите со најавата дека претстојната турнеја, која започнува во јуни, најверојатно ќе биде нејзината последна големото меѓународно патување.

„Многу сум возбудена за оваа турнеја, но мислам дека тоа нема да се повтори долго, долго, долго време. Сакам да дадам сè од себе и ова да биде последен поздрав за сега“, изјави таа во поткастот на Ејми Полер.

Пејачката објасни дека поп-кариерата целосно ѝ го „презела“ животот и дека сега сака да им даде приоритет на своите други пасии, како што се мјузиклот и комедијата.

Од „Злобница“ до нови филмски улоги

По огромниот успех на филмската адаптација на „Злобница“, каде ја играше Глинда, Аријана планира повеќе да му се посвети на Холивуд.

Таа веќе ја потврди својата следна улога во комедијата „Focker-In-Law“, дел од познатата франшиза „Meet the Parents“, каде ќе глуми покрај легендите Бен Стилер и Роберт Де Ниро.

Турнејата на Аријана Гранде ќе започне во САД и Канада, а ќе заврши со дури 10 последователни концерти во „О2 Арената“ во Лондон.