Пиротехничарот Ѓорги Стефанов од Дирекцијата за заштита и спасување (ДЗС) повеќе од една недела сам ги откопува гранатите од Првата светска војна кои беа пронајдени при копање на приватна парцела кај битолската касарна, пишува „СДК.мк“. Откриени се преку 1.000 минофрлачки гранати, рачни бомби и други експлозивни средства.

Стефанов вели дека има уште голема количина која треба да се откопа, но прво треба да се уништат ископаните, а за целата акција тој нема никаква помош – во Македонија останале само уште двајца пиротехничари, кои мора да ја покријат цела територија во зависност од повиците за откопување бомби што ги добиваат. Претходно имаше обуки од американски експерти, но со укинувањето на помошта и фондовите од САД, обуките се укинале. Во меѓувреме, дел од пиротехничарите се пензионирале, пишува порталот.

Во ноември 2021 година, од ДЗС алармира дека за три години државата ќе остане без пиротехничар ако не се вработат млади кадри. Тогаш во целата држава имаше седум пиротехничари за отстранување неексплодирани убојни средства, од кои најмладиот беше 50-годишник, највозрасните беа на 66 години и одамна за пензија, но го продолжуваа работниот век оти немаше кој да ги замени. Во повеќето држави, пиротехничарот завршува со работа на 55 години.

‘Рѓосана авионска бомба е најдена на улица „Нов Белград“ во Кавадарци