Утринава Скопје осамна со старите залихи на леб и тоа од специјалните видови, кои во најголемиот дел од продавници останале од вчера. Пекарите ја остварија заканата и не доставувале бел и полубел леб по цена од 33 денари.

Утрово нѐ известија од четирите фурни кои редовно ни носат леб, дека нема да има достава ниту денес, ниту утре, а во петок евентуално ќе има специјални видови на леб, велат од една помала пекара во Аеродром.

Во дел од маркетите, на поголемите трговски синџири, денеска пекарите ги известиле дека денес нема да им достават леб и тие ќе ги продаваат старите залихи.

Според раководителите на маркетите, тие не знаат како денеска ќе го поминат денот, ниту пак знаат дали треба да прават нарачка за утре.

„Обично добиваме бел и полубел леб во 7 наутро, а не знаеме што ќе се случува во текот на денот и утре“ вели за „Слободен печат“ раководителка во еден маркет во центарот на Скопје.

Во маркетите иако се залепени новите замрзнати цени од 33 денари, полиците се празни.