Шетајќи по широката пешачка улица што се протега по подножјето на познатиот рид Акропол во Атина, посетителите сега можат да уживаат во нешто што не е видено со децении: непречен поглед на храмот Партенон без скелиња, објави Асошиејтед Прес (АП).

Скелињата кои се поставени по западната фасада на храмот од 5 век п.н.е. за конзерваторски работи пред околу 20 години се отстранети, овозможувајќи непречен поглед на местото на светското наследство на УНЕСКО.

Западната страна на Партенон нуди најдобар поглед на ниво на улица, па затоа отстранувањето од таа страна, кое беше завршено кон крајот на септември, беше најзабележително за посетителите.

Грчката министерка за култура Лина Мендони истакна дека ова е првпат по околу 200 години надворешноста на Партенон да е целосно ослободена од каков било вид скелиња од која било страна.

„За посетителите, како да гледаат различен, сосема различен споменик“, рече Мендони во интервјуто на радио Скај.