Ози Озборн „ќе се врати“ како дигитален аватар управуван од вештачка интелигенција, речиси една година по неговата смрт, пишува музичкиот магазин „Билборд“. Веста беше објавена на саемот за лиценцирање во Лас Вегас во средата, на дваесетти мај, кога синот на Озборн, Џек Озборн, го претстави проектот за време на дискусија за иднината на брендот на Ози, во која учествуваше и неговата сопруга Шерон Озборн.

Во таа прилика Џек Озборн изјави:

„Дури и малку е страшно колку е тоа навистина прецизно. Тој ќе постои дигитално како самиот себеси сè додека постојат компјутери. Технологијата напредна толку многу што сè е речиси како (drag and drop) влечи и пушти. Можеш да создадеш образец за реклама, буквално да напишеш што сакаш дигиталниот Ози да направи во таа реклама и само да го вметнеш. Сега е толку едноставно.“

Аватарот на Ози е резултат на партнерство меѓу компанијата „Хиперреал“, која се опишува како компанија за дигитална човечка технологија што користи патентирана технологија „дигитална ДНК“ за создавање дигитални аватари, и „Прото Холограм“, која се опишува како платформа за холограми и просторни компјутерски решенија во областа на забава, здравство, образование, финансии, трговија и други сектори.

Според „Хиперреал“, нивната технологија „дигитална ДНК“ ќе овозможи аватарот на Ози да „разговара со обожавателите и да се движи, зборува и реагира како Ози“.

Компанијата за списанието „Билборд“ изјави дека аватарот на Ози ќе почне да се појавува во уредите „Прото Лума“, кои претставуваат интерактивни екрани во природна големина, во САД и Обединетото Кралство, почнувајќи од крајот на летото две илјади и дваесет и шеста година.

Ремингтон Скот, извршен директор на „Хиперреал“, изјави:

„Секој елемент од овој аватар е создаден исклучиво од автентичен, одобрен изворен материјал: селектиран, одобрен и контролиран од луѓето што најмногу го сакаат. Ова е жива изведба, а не обична дигитална репродукција; и се темели на ништо што не било дадено доброволно. Имаме ентузијастичко учество од семејството на Ози, и тоа целосно ја менува суштината на овој проект.“

Дејвид Несбаум, основач на „Прото Холограм“, додаде:

„Чест е да ни биде доверено да вратиме една од вистинските божества на рокот назад во светот, за да продолжи да се поврзува со обожавателите. Благодарност до Шерон и Џек. Немаше да го правиме ова доколку не верувавме дека технологијата на двете компании ќе создаде искуство кое навистина ќе го продолжи присуството, срцето и душата на Ози во иднината.“

Ова не е првпат компанијата „Хиперреал“ да создаде дигитален аватар на позната личност. Во минатото, тие имаат претставено аватари на познати личности како што се музичарот познат како Ноториус Б. И. Џи., фудбалската ѕвезда Лионел Меси и авторот на стрипови на Марвел, Стан Ли.