Кога Џоел Фурман, популарен американски лекар и еден од најпознатите нутритаријанци кој ја застапува растителната исхрана особено богата со хранливи материи, го создаде својот модел – индекс на густина на хранливи материи, една наизглед обична зелена билка се искачи на самиот врв на супер-храната.

„За постигнување одлично здравје клучна е соодветната консумација на микронутриенти – витамини, минерали и други фитохемикалии – без претерување со храна. Микронутриентите го поттикнуваат правилното функционирање на имунолошкиот систем, овозможуваат механизми за детоксикација и обнова на клетките кои нè штитат од хронични болести. Нутритаријанска храна е онаа што има висок сооднос на микронутриенти по калорија и високо ниво на разновидност на микронутриенти“, истакнува Фурман.

А број еден на целата планета, според истражувањата, е поточарката. Таа е извор на повеќе од 28 есенцијални витамини, минерали и хранливи состојки, повеќе од кое било друго растение, а со неа може да се спореди само кељот. Тој, пак, погрешно се советуваше да го избегнуваат луѓето со проблеми со тироидната жлезда, но поточарката го нема тоа ограничување.

Досегашните студии покажуваат дека поточарката има бројни потенцијални здравствени придобивки, вклучувајќи антимикробни својства, може да помогне во одредени хемотерапевтски третмани за да се спречи растот и да се поттикне смртта на клетките на ракот, го намалува воспалението во телото и има кардиопротективни ефекти благодарение на високата содржина на антиоксиданси. Поточарката припаѓа на групата на крстоцветен зеленчук, познат како борец против ракот поради високата содржина на фитохемикалиите изотиоцијанати. Истражување на Институтот за рак на Универзитетот во Питсбург ја поврзува водената крес салата со намален ризик од неколку видови рак, вклучувајќи го и ракот на простатата. Честата консумација на оваа билка е поврзана и со намалување на оштетувањата на ДНК и зголемена антиоксидативна активност во телото, што може да помогне во борбата против ракот, според истражување објавено во „Американ журнал од клиникал нутришн“.

Покрај тоа, поточарката високо котира и на листата на „антидепресивни“ намирници бидејќи содржи многу хранливи материи што помагаат во ублажување на симптомите на депресивно расположение. На пример, содржи повеќе фолати од бананата и повеќе витамин Ц од портокалот, што ја прави значаен засилувач на имунитетот. Богата е со железо, а за разлика од другите растителни извори, телото лесно го апсорбира благодарение на витаминот Ц, кој помага во конверзијата на железото во форма што се наоѓа во месото. Покрај железото, поточарката содржи калциум, калиум и магнезиум – минерали неопходни за изградба на коските и мускулите. Исто така, е одличен извор на витамин А, кој е неопходен за добар вид, здрава кожа и одржување на имунолошката функција. Таа е и еден од најдобрите извори на витамин К, кој помага во формирање и зајакнување на коските и го намалува оштетувањето на невроните во мозокот. Природно е нискокалорична, но одлично заситува поради високата содржина на вода и влакна.

Но, може ли да се изеде премногу? И покрај нејзините извонредни својства и богат хранлив профил, тоа не значи дека треба да се консумира во огромни количини. Сто грама дневно е доволно, бидејќи во поголеми количини етеричните масла кај почувствителните лица можат да предизвикаат иритација на мочниот меур, бубрезите и желудникот. Значи, како што често е случај – помалку е повеќе, дури и со најздравата храна на светот.