Со вклучување и исклучување на протеинот ДЕКТИН-1, кој штити од габични инфекции, може да се избере начинот на кој имунолошкиот систем реагира.

Протеинот во имунолошкиот систем програмиран да го штити телото од габични инфекции е исто така одговорен за влошување на некои автоимуни болести како што се синдромот на нервозно дебело црево, дијабетес тип 1, егзема и други хронични болести, покажува новото истражување на научниците од Австралискиот национален универзитет. Ова откритие, објавено во „Саенс Адвенсис“ (Science Advances), би можело да го отвори патот за создавање на нови и поефикасни лекови без сериозни несакани ефекти од постоечките третмани.

Научниците открија досега непозната функција на протеинот познат како ДЕКТИН-1, кој во пригушена состојба го ограничува производството на Т-клетки или таканаречените чуварски клетки во имунолошкиот систем.

Овие клетки се клучни за спречување на автоимуни болести бидејќи ги потиснуваат ефектите на хиперактивниот имунолошки систем, кој може да биде исклучително опасен доколку не се регулира правилно.

Имунолошкиот систем го штити телото од инфекции, но во екстремни случаи станува преактивен и го поттикнува одбранбениот систем на телото да се бори против себе, пишува „Медикалекспрес“ (MedicalXpress).

– Кога тоа ќе се случи, имунолошкиот систем погрешно ги препознава здравите клетки како закана, што доведува до напад на телото и предизвикува автоимуна болест. Иако протеинот ДЕКТИН-1 помага во борбата против габични инфекции, во неговата потисната состојба е одговорен и за влошување на тешките автоимуни болести. Ако разбереме како и зошто пригушената верзија на овој протеин предизвикува автоимуни болести кај пациентите, ќе бидеме чекор поблиску до развој на ефективни лекови и ќе понудиме нова надеж за повеќе од милион Австралијци кои страдаат од автоимуна болест – изјави д-р Синтија Турнбул од Австралискиот национален универзитет.

Научниците веруваат дека можат да го контролираат имунолошкиот систем со вклучување и исклучување на протеинот ДЕКТИН-1.

– Вклучувањето на протеини би го намалило интензитетот на одбраната на имунолошкиот систем, што би можело да се користи за лекување на автоимуни болести. Од друга страна, исклучувањето на протеинот би можело да го зголеми интензитетот на имунолошкиот систем и да го зајакне одбранбениот механизам за лекување на сосема поинаков вид на болест – изјави проф. Керол Винус од Институтот Френсис Крик.

Д-р Турнбул смета дека сето ова значи дека ДЕКТИН-1 може да игра клучна улога во лекувањето на ракот.

– Клетките на ракот можат да се маскираат со ослободување на одредени протеини и хемикалии во телото, што во суштина ги прави невидливи за природната одбрана на имунолошкиот систем. Сметаме дека користењето лекови за исклучување на протеинот ДЕКТИН-1, во комбинација со постоечките терапии, може да го активира имунолошкиот систем и да му помогне да ги идентификува и нападне канцерогените клетки – рече таа.