Музејот „Паноптикум“ во Хамбург, Германија, неодамна претстави нова восочна фигура на принцезата Кејт Мидлтон, што веднаш предизвика реакции кај посетителите и корисниците на интернет. Фигурата ќе биде изложена заедно со восочни фигури на други познати личности, како што се Ед Ширан и Тејлор Свифт, пишува „Сан“.

Скулпторката, Лиза Бишер, и нејзиниот тим рабеле на фигурата од летото. Кејт е прикажана во темнозелена облека од дизајнерката Џена Пакам, со дискретна, но препознатлива кралска шминка.

– Не само што внимателно го моделиравме фустанот, туку и шминката за јавното појавување, одржувајќи кралски суптилен изглед. Секако, не изостана ниту препознатливиот ајлајнер на Кејт, со мал затемнет ефект на очите – рекла Бишер.

Тимот користел стотици фотографии, а забите биле особено тешки за имплементација, барајќи дури 30 часа работа.

Сепак, реакциите на публиката беа мешани – многумина сметаа дека фигурата не личи доволно на вистинската Кејт. Коментарите се нижеа на социјалните мрежи:

Еден корисник на „Икс“ напиша само кратко: „Бљак“.

Француското списание „Париз мач“ ја опиша фигурата како „малку неуредна сличност“.

На Фејсбук, некој ги спореди забите на статуата со цртаниот лик „Сунѓерот Боб“.

Посетителите на музејот рекоа: „Бевме разочарани и делумно ужаснати“; „Не гледам голема сличност“.

Ова не е првпат „Паноптикум“ да предизвика контроверзии. Минатата година, восочна фигура на кралицата Елизабета Втора предизвика критики поради недостатокот на коса. Директорката на музејот, д-р Сузан Фербер, тогаш објасни: „Бидејќи користиме вистинска човечка коса, што е многу скапо, некои фигури со капи воопшто немаат коса. Тоа е восочна фигура, а не вистинска личност“.

Таа додаде дека кралското семејство се перцепира поинаку во Германија отколку во Велика Британија, каде што медиумите мора да бидат повнимателни.

ФОТО | Кејт Мидлтон воодушеви во раскошна тоалета и круна со 2.600 дијаманти на банкет во замокот Виндзор