Осумте повредени во несреќата кај Нови Сад се во стабилна состојба. Момчето транспортирано во Белград е исто така витално и стабилно, но под постојан надзор на лекарите, јави РТС.

Едно дете загина, а седум деца и возачот се повредени во тешка сообраќајна несреќа што се случи околу 4:30 часот утрово на автопатот Суботица-Белград, во близина на наплатната рампа во Нови Сад, во правец кон главниот град.

Доктор Милош Пајиќ, раководител на Детската хирургија во Нови Сад, за РТС изјави дека момчињата се добро.

„Двајца се сместени на интензивна нега – едно момче има тешки повреди на вратниот дел на ‘рбетниот столб и е префрлено во Клиничкиот центар на Србија, другото е оперирано поради повреди на меките ткива на подглавата и е добро. Петмина се примени на трауматологија и се во стабилна состојба“, рече Пајиќ.

Во комбето имало осум малолетници, на возраст од 13 до 16 години, сите членови на џудо клубот „Партизан“ од Белград, кои се враќале од меѓународен турнир и спортски камп во Азербејџан. Според зборовите на тренерот на клубот Небојша Мандиќ, децата летале од Баку за Будимпешта, од каде што со две комбиња во приватната организација на родителите се упатиле кон Белград.

Комбето, под засега неразјаснети околности, излетало од патот, ја пробило заштитната ограда и паднало во каналот. Три екипи од Институтот за итна медицина на Нови Сад излегле на местото на настанот, кои можеле само да ја потврдат смртта на шеснаесетгодишно момче, додека седум деца биле пренесени во Институтот за здравствена заштита на деца и млади на Војводина.

Комбе со џудисти се преврте во Србија: Загина дете, а осуммина се повредени