Осудена вдовицата на францускиот сериски убиец Фурнире, му помагала во киднапирањето на жртвите
Моник Оливие (75), вдовицата на францускиот сериски убиец Мишел Фурнире, е прогласена за виновна за учество во силување и убиство на две млади жени и исчезнување на деветгодишно дете, пишува Би-Би-Си.
Претходно овој месец, Оливие призна дека му служела на својот сопруг како мамка за британската студентка Џоан Париш во 1990 година, која ја силувал и убил. Оливие е осудена и во врска со убиството на 18-годишната Мари Анџела Домека во 1988 година и исчезнувањето на 9-годишната Естел Музин во 2003 година.
Оливие веќе отслужува доживотна затворска казна изречена во 2008 година и сега се соочува со втора доживотна затворска казна, јавува Би-Би-Си. Таа претходно беше осудена за нејзината улога во четири убиства и силување извршено од нејзиниот сопруг.
Серискиот убиец Фурнире беше обвинет за киднапирање, силување и убиство, но почина во 2021 година на 79-годишна возраст, па никогаш не беше изведен на судење.
Пред неговата смрт, Фурнире изјави во 2018 година дека само тој е одговорен за судбините на неговите жртви. „Ако тие луѓе не ми се појавеа на патот, сè уште ќе беа живи“, рече тој. За време на судењето, Оливие се опиша себеси како куче кое мора да го послуша својот господар и рече дека е неоправдано што таа служела како мамка за жртвите на нејзиниот покоен сопруг.
Пред расправата во судницата, Оливие побара прошка од семејствата на жртвите. „Се каам за се што направив и барам прошка од семејството на жртвите, иако знам дека тоа е непростливо“, рече таа.
Двојката работела заедно 16 години за да киднапираат и убијат најмалку осум девојчиња и млади жени, објави Би-Би-Си. Конечно биле запрени во 2003 година, кога 13-годишното девојче, кое Фурнире се обидувал да го киднапира, успеало да побегне. Ова довело до негово и апсење на Оливие.
Би-Би-Си објави дека познатите жртви на Фурнире – освен Париш, Домеси и Музин – биле Изабел Лавил, Фабиен Лерој, Жан-Мари Десрамо, Елизабет Брише, Наташа Данаис, Селин Сејсон, Манања Тумфонг и Фарида Хамиш.
Сите жртви на Фурнире биле силувани, застрелани, задавени или избодени до смрт, објави Би-Би-Си. Повеќето биле убиени во регионот Ардени, во северна Франција и во Белгија. И Фурнире и Оливие беа екстрадирани во Франција. Шест жртви се француски државјани.
