Трошоците за организација на Летните олимписки игри во Токио што се одржаа минатото лето ќе изнесуваат 13,6 милијарди долари Организацискиот комитет ќе се распушти следниот месец и ќе го објави завршниот извештај, изјави директорот на ова тело, Тоширо Муто.

Муто по состанокот на Извршниот одбор изјави дека сумата мое да биде и „малку пониска“.

– Го прегледуваме секој детаљ. Тоа не е нешто што можам да кажам дека е причината зошто очекуваме помала бројка – рече Муто.

Организаторот во декември минатата година соопшти дека вкупните трошоци за организирање на Олимписките игри во Токио, биле за 1,8 милијарди долари помалку од проценетите 15,4 милијарди долари. Помалата сума се должи на намалените трошоци за ангажирање на дополнителни работници поради тоа што не беше дозволено присуство на навивачи на трибините.

Пред почетокот на Игрите во Токио, неколку владини ревизори изјавија дека трошоците може да бидат двојно повисоки од пријавените.

Целата сума не падна на товар на јапонската влада бидејќи 5,9 милијарди долари се приватни пари, односно пари на спонзорите на Игрите.