Додека италијанскиот репрезентативец и дефанзивец на Интер, Алесандро Бастони, играл натпревар од Лигата на шампионите на „Сан Сиро“, провалници ја ограбиле неговата семејна вила во луксузното место Кастели Калепио, во областа Бергамо. Од домот е украден плен проценет на околу половина милион евра.

Семејството на Бастони во моментот на кражбата не било дома. Според полициската реконструкција, најмалку четворица напаѓачи пристигнале околу 18:30 часот, прескокнале ограда, влегле низ вентилациски систем и искршиле подрумски прозорец. И покрај активираниот аларм, провалниците успеале за неколку минути да ги однесат скапоцените „Ролекс“ часовници, накит, брендирана гардероба и чанти – меѓу кои и „Hermès Kelly“, вредна десетици илјади евра.

Снимките од видео-надзорот покажуваат дека сторителите биле маскирани, со капи и ракавици. Полицијата анализира околни безбедносни камери со цел да го открие возилото со кое избегале.

Ова е само последен случај во серија ограбувања насочени кон фудбалери во Бергамо. Во последниве години мета на крадците биле и Рафаел Толои, Луис Муриел, Демирал и Бога. Полицијата сомничи специјализирани банди кои ги следат натпреварите, социјалните мрежи и навиките на фудбалерите, а потоа делуваат кога домовите им се празни.