Челси и официјално го промовираше Чаби Алонсо за нов менаџер на тимот. Шпанскиот стратег потпиша четиригодишен договор, а функцијата ќе ја преземе од јули.

За Алонсо ова ќе биде нов предизвик по разделбата со Реал Мадрид, каде што не успеа да ги исполни очекувањата. Сепак, поранешниот шпански репрезентативец не го криеше воодушевувањето што добива можност да седне на клупата на лондонскиот гигант.

„Челси е еден од најголемите клубови во светот и огромна чест е да се биде менаџер на ваков клуб. Од првите разговори со сопствениците и спортскиот сектор почувствував дека имаме иста визија и амбиции. Целта е да изградиме тим кој постојано ќе биде конкурентен на највисоко ниво и ќе се бори за трофеи“, изјави Алонсо.

Тој додаде и дека во тимот гледа голем потенцијал и квалитет, нагласувајќи дека приоритет ќе биде создавање победнички менталитет и стабилен систем кој ќе носи успеси во иднина.

Пред ангажманот во Реал Мадрид, Алонсо остави силен впечаток на клупата на Баер Леверкузен, со кој успеа да ја освои титулата во Бундеслигата.