Една од најпознатите новогодишни елки во Германија, онаа што секој Божиќ се поставува пред Бранденбуршката порта во Берлин е исечена во Тирингија и го започна своето патување кон германската престолнина, пренесува „Куриер“.

Дрвото од смрека, високо 16 метри, било исечено во близина на градот Земерда, а потоа со кран било натоварено на камион, соопшти портпаролот на локалната шумарска служба.

Според неговите зборови, критериумите за новогодишната елка што ќе ја краси Бранденбуршката порта се многу строги, а потрагата по соодветно дрво трае цела година.

Како што се наведува, дрвото мора да биде совршено конусно по форма, гранките треба да допираат до земја, а неопходно е да има и густи иглички.

Портпаролот на шумарската служба истакна дека дрвото за Бранденбуршката порта по 11. пат доаѓа токму од Тирингија.

„Многу сме задоволни што можеме да донесеме радост на жителите на Берлин, како и на многубројните посетители на градот“, изјави тој.

Новогодишното дрво треба да биде поставено во понеделник, наведува германскиот лист.