Градоначалникот на Град Скопје, Орце Ѓорѓиевски назначи нови директори на уште две јавни претпријатија.

Од вчера, како што јавува телевизија „Телма“ со ЈП „Дрисла“ ќе раководи Стефче Трпковски, доскорешен градоначалник на Општина Сопиште од редовите на ВМРО-ДПМНЕ.  Тој доаѓа на местото на Самир Хусени, кој оваа функција ја вршеше од февруари годинава и беше последен во низата директори именувани во мандатот на Данела Арсовска.

Нов в.д. директор доби и ЈП „Градски Паркинг“. Во ова претпријатие, каде досега директоруваше Мартин Гаврилски, е назначен Владимир Кроневски од Демократски сојуз.

Кроневски беше раководител на Секторот паркиралишта, но и помошник директор во ова претпријатие во мандатот на два претходни градоначалници, Коце Трајановски и Петре Шилегов. На новата функција доаѓа од директорското место во „Службен весник“.