Први септември учениците ќе го дочекаат со проблемите од минатата година, без навремено доставени учебници за трето и шесто одделение, за кои Министерството за образование и наука очекува дека ќе бидат доставени набргу по почетокот на оваа учебна година. Минатата година немаше учебници по некои предмети, а наставниците импровизираа со привремени материјали, за кои државата се задолжи во Светска банка 640 илјади евра. Учебниците беа стари, а во новите имаше многу грешки, учебникот по Македонски јазик учениците го добија две недели пред крајот на школската година, а учебникот по Историја за петто одделение беше повлечен од употреба поради грешки во содржината.

Министерството за образование и наука појаснува дека учебниците доцнат, бидејќи постапката за изработка и одобрување учебници, која е уредена со Законот за учебници во основното и средното образование, е сложен процес кој може да потрае и неколку месеци, па затоа доцнеле учебниците минатата година.

– Затоа се случува тој процес, за одреден предмет, да не се заокружи пред почетокот на нова учебна година. Тоа е така поради разни причини, се случува за предметот да нема интерес за доставување ракописи од автори и потоа целиот процес мора да се повтори. Се случува и да се достават ракописи за кои рецензентските комисии ќе побараат извесни корекции по кои авторите мора да постапат, што исто така го пролонгира завршувањето на постапката. Проблем настанува и во немањето рецензенти кои ја имаат клучната улога во давање мислење за ракописите. Потоа следува разгледување и одобрување од Националната комисија за учебници, па техничко уредување, печатење и испорака, велат од МОН.

Учениците од петто одделение повторно без учебник по Историја

Минатата учебна година беше повлечен учебникот по Историја и општество за петто одделение. Причината беше потребата од технички исправки и корекции на одредени содржини со неточни податоци, како што се географските карактеристики на Македонија, грешка во историската периодизација, лажни и нејасни факти …

Историчарите побараа веднаш да се повлече учебникот, додека авторките Анита Ангеловска и Гликерија Илиоска со заедничко писмо тогаш информираа дека веднаш штом ги забележале грешките по печатењето апелирале да се направат исправки, барем во електронската верзија на учебникот.

– По овој предмет ќе има помошен материјал по кој ќе се изучува материјата додека не се изработи и достави учебникот – велат од Министерството.

МОН работи на дигитализација на учебниците

Во фаза на изработка е посебен портал преку кој учениците ќе можат да ги симнуваат и користат дигиталните учебници.

Дигитална верзија ќе добијат сите учебници од четврто и погорните одделенија во основното образование и процесот на дигитализација ќе се одвива етапно. Годинава МОН работи на дигитализација на учебниците за четврто, петто и шесто одделение.

Во седмо, осмо и деветто одделение ќе се користат веќе одобрените учебници од изминатите години, а тиражот ќе биде надополнет со новоиспечатени комплети во број колку што самите училишта пријавиле во текот на мај.

Постапките се спроведуваат согласно законите и роковите?

Министерството вели дека навремено ги спроведува сите постапки за изработка и одобрување на учениците и тие секогаш се согласно законите и роковите. Тие додаваат дека прават максимални напори за учениците да го имаат основното средство за совладување на наставната материја по секој еден предмет и новата учебна година ќе биде значително поподготвена во однос на минатите.

Подготвителните активности за успешен старт на новата учебна година се интензивираат и учениците, родителите и наставниците треба да бидат спокојни и ослободени од грижите кои ги имаа во изминатите години од аспект на обезбедени учебници, наставни и нагледни средства, услови за настава и слично, уверува МОН.

Новата учебна година ќе започне на 1 септември, а ќе заврши на 17 јуни откако на владина седница, на предлог на МОН беше изгласана одлуката да има и пролетен распуст.

Пролетниот распуст ќе биде во период од 29 до 5 мај. Првото полугодие ќе заврши на 29 декември декември, а второто ќе почне на 22 јануари.

Со ова, ќе им се овозможи на учениците да имаат пролетен распуст по примерот на европските држави – изјави тогаш Шаќири и додаде дека пролетниот распуст е за сите, односно и за наставниците и останатите вработени, кои нема да одат на работа во тие седум дена.