Норвешката престолонаследничка Мете-Марит, сопруга на престолонаследникот Хокон од Норвешка, со години се бори со белодробна фиброза – неизлечива болест која постепено го отежнува дишењето.

Според германскиот „Билд“, нејзината состојба значително се влошила, поради што се подготвува за можна трансплантација на бели дробови.

Поради здравствените проблеми на Мете-Марит, семејството се обидува да поминува што повеќе време заедно. Нејзината ќерка, принцезата Ингрид Александра, одлучила привремено да ги прекине студиите во Австралија и да се врати во Норвешка за да биде покрај мајка си.

Дваесет и двегодишната принцеза минатото лето започна студии по меѓународни односи и политичка економија на Универзитетот во Сиднеј. За нејзината одлука да се врати дома зборуваше и принцот Хокон за време на неодамнешната посета на Јапонија.

„Таа наскоро сака да се врати дома, а тоа е поврзано со нашата семејна ситуација. Сака да биде со својата мајка“, изјавил тој.

Сепак, принцезата не планира целосно да се откаже од студиите и има намера да го заврши факултетот, иако во моментов не е познато кога ќе може да продолжи со образованието.

„Колку долго ќе остане дома, ќе видиме. Во моментов е важно да бидеме заедно како семејство“, рекол Хокон, кој поради состојбата на сопругата го скратил своето патување во Јапонија.

И нивниот син, принцот Свере Магнус, неодамна се вратил во Норвешка. Тој извесно време престојувал во Италија, каде што сакал да стекне искуство во филмската и фотографската индустрија во Милано, но во последните недели најголемиот дел од времето го поминува со семејството.