Шпанскиот пејач Хулио Иглесијас, кој беше обвинет за сексуално и психолошко злоставување од страна на две поранешни вработени, ги негираше обвинувањата и рече дека никогаш „не присилил ниту омаловажил ниту една жена“, пренесува „Евроњуз“.

Тој се огласи преку објава на својот инстаграм-профил во која рече дека обвинувањата се „целосно лажни“, дека никогаш не чувствувал „ваква злоба“ и дека е жртва на „клевета“.

Како што рече, има сила да го одбрани своето достоинство и да се осигура дека „луѓето ќе ја знаат целата вистина“.

– Со големо жалење одговарам на обвинувањата на две лица кои порано работеле во мојата куќа. Никогаш не сум злоупотребувал, присилувал ниту омаловажувал ниту една жена. Овие обвинувања се апсолутно лажни и длабоко ме повредуваат – напишал Иглесијас.

Две жени кои работеле во неговите вили на Карибите, го обвинија пејачот за сексуален напад и во тужбата наведоа дека биле сексуално нападнати и подложени на „несоодветно допирање, навреди и понижување, во атмосфера на контрола и постојано вознемирување“.

 

View this post on Instagram

 

A post shared by Julio Iglesias (@julioiglesias)

Наводните напади, за кои се вели дека се случиле во 2021 година, станаа јавни во вторник по тригодишна заедничка истрага на шпанскиот новински сајт „Ел Диарио“ и телевизиската мрежа на шпански јазик „Јунивижн“.

Според истрагата на новинарот, жените немале договори за работа, морале да ја покажат содржината на своите телефони, па дури и им било забрането да го напуштат живеалиштето, а како што навеле, биле подложени на тестови за ХИВ, хепатитис и хламидија, како и на гинеколошки прегледи.

Жените наводно биле контролирани од доверливите асистенти на пејачот, кои понекогаш биле сведоци на злоупотребата, а понекогаш учествувале во неа.

Шпанија размислува да му го одземе орденот на Хулио Иглесијас по обвинувањата за сексуално вознемирување