Додека топлото време е добро за многу граѓани поради поскапувањето на енергенсите, на некои им носи милионски загуби. На планините во Босна и Херцеговина наместо „бело ќебе“, има зеленило. Минатиот декември и секоја зима пред пандемијата, имаше илјадници луѓе на Равна Планина, сега сликата е поинаква, информира Кликс ба.

„Ова време е невообичаено за овој период од годината. Минатата година беше завеано со снег, а сега е пролет. Загубите се ненадоместливи, но треба да се издржи и да се продолжи понатаму…“, изјави Вељко Голијанин, сопственик на скијачкиот центар „Равна планина“.

Туристите ги откажуваат резервациите во апартманите. Вистинската зима нема да ја има, велат метеоролозите до средината на јануари. Во последните 20 години никогаш немало ваква ситуација во Босна и Херцеговина. На Јахорина моментално има вештачки снег, а дополнителен проблем е што не може да се користат топови, како досега, бидејќи температурата не е -3 Целзиусови или помалку. Поради тоа, загубите се исклучително високи.

„Очекувавме повеќе од седум милиони КМ во декември, но овде следиме ситуација која не е добра. Не е добро ниту за хотелиери и ресторани. Очекуваме барем таа температура да произведува снег кога нема врнежи“, додаде Дејан Љевнаиќ, директор на ОЦ Јахорина.

Додека Олимпискиот центар ја чеша главата поради временските услови, туристите се разочарани. Најголем дел од гостите овде се од Србија, Хрватска и Словенија, но има се повеќе туристи од Унгарија, Романија, Англија, како и од Кина и арапските земји. Иста е состојбата и во Влашиќ, Бјелашница и Игман.