Липи ја напушти селекторската клупа на Кина после поразот од Сирија (2:1) во квалификациите за пласман на Светското првенство во Катар 2022 година.

– Доколку преземам таков тим каков што е на теренот…Заработив многу пари и не сакам да им „украдам“ уште повеќе. Затоа си поднесов неотповиклива оставка – рече Липи, а пренесуваат италијанските медиуми.

Кина на две кола пред крајот на првата фаза од квалификациите има пет бодови помалку од лидерот Сирија, а победникот оди понатаму заедно со четири најдобро второпласирани од сите осум групи.

Италијанскиот стручњак веќе седум години е во најмногубројната земја во светот, прво го водеше Гвангжу Евергранде со кој освои три титули шампион на Кина и една Азиска Лига на шампиони, а потоа и двапати во низа со тамошниот национален тим.

Во текот на долгата кареира, со италијанската репрезентација се прослави со титулата светски шампион на Мундијалот во Германија во 2006 година, водеше бројни клубови како Јувентус, Интер, Наполи, Аталанта…