Градоначалникот на Скопје, Орце Ѓорѓиевски, даде целосна поддршка за заклучоците на Советот за справување со аерозагадувањето, меѓу кои е и согласноста фабриката за цемент „Титан Усје“ да се премести надвор од градот.

Ѓорѓиевски смета дека Цементарницата, сепак, не е единствениот проблем, туку дека сите индустриски погони, како тие во Железара, фабриките за кабли и одредени отпади, мора постепено да се дислоцираат од урбаното подрачје.

Инспекциите, вели градоначалникот, веќе изрекле казни од по 53.000 евра за индустриски капацитети со Б-дозвола кои не ги почитувале еколошките стандарди. Тој тврди дека контролите на терен се постојани и одговорни.

Се планира итно проширување на топловодната мрежа за да се опфатат сите згради и куќи во центарот кои се уште не се приклучени, а интензивно се работи и на гасификацијата.

„Повеќе од 30 години само се констатира проблемот, но ништо не е помрднато од мртва точка. Време е конечно да изградиме систем кој ќе ги промени работите“, рече Ѓорѓиевски.