Фудбалерите на Шкендија, која вечерва го загуби финалето на Купот на Македонија од Силекс, не се појавија на подиумот за време на доделувањето на трофејот, а клубот за тоа не даде никакво објаснување. На ова му претходеше скандалозно однесување на навивачите на клубот од Тетово, кои пред почетокот ја исвиркаа македонската химна, а за време на натпреварот извикуваа недолични и националистички скандирања.

Играчите на Шкендија, откако заврши инаку коректното финале кое го загубија со 1:0, стоеја под трибината на која беа нивните навивачи, и покрај тоа што неколкупати беа повикани да дојдат на подиумот, каде што требаше да ги примат сребрените медали кои му следуваат на поразениот во финалето.

Потоа, додека траеше прогласувањето на победникот и доделувањето на трофејот, фудбалерите на Шкендија тргнаа кон соблекувалната.

Тренерот на тетовскиот клуб, Јетон Беќири, се појави на прес-конференцијата, но кога беше запрашан за несфатливото и неспортско однесување кое го покажаа со неговата екипа, рече дека „не е компетентен да коментира“.

Дел од медиумите неофицијално објавија дека управата на Шкендија инсистирала фудбалерите да не се појават на доделувањето на трофејот, но дека не се знае кое е оправдувањето за таквиот потег. Претставници на Фудбалската федерација на Македонија (ФФМ), исто така неофицијално, најавуваат сериозна казна за Шкендија по вечерашниот скандал.

ГАЛЕРИЈА | Фудбалерите на Силекс го освоија Купот на Македонија